Si Ar - 1

 Si - Ar 

Then - 1 na 

Ziaktu - Honeyi nu🍒 

 

(Ka edit famkim hman nganglo a, spelling diklo a a awm a nih chuan minlo hrethiam ngawt mai dawn nia)

Tleirawl pakhat chu thei leh theiloin hmanhmawh takin a tlân a, a ipte puia a ah lai,riltram leh vawt tih vanga trap râwih2 naute chu bâng tawh se a duh lutuk. Hetiang reng renga a trah bengchhen zawngin mi tu emaw talin an rawn hmu hman takngial ang! 

Tleirawl mai a ni a, a rai tih tuman an hrelo. A theih tawpin a khuh a, ringhlela amah zawttu te lah “ka thau a” tih bakin a chhâng ngailo kha a nia. A nu a bum theih nan thla tin stayfree a lei tir ziah bawk. Mahse, zaninah khan nau a vei a, a nu te awm loh lai a ni hlauh a, vannei tak a ni. Chuan, hei, a nau neih atrangin minute 30 pawh a la rallo tihah a naute dah bo dan a ngaihtuah mek a, tun dinhmunah chuan nau pawm a inpeih lo a, a pa lah puh tur ber a hre heklo. Hmingchhiat piah lamah nu dinhmun luah tur em chuan a huaisen ngam rihlo!

 Khawtlâng ina an bawlhhlawh paih khâwmna thrin a thlen chuan a ipte pui chhunga a naute dah chu a la chhuak a, rambo polythene-ah tuam nawk nawkin bawlhhlawh paihnaah chuan a theh thla ta a, a rang a rangin in lam a pan leh ta nghal. In a thlen chuan anu leh pate leng chu an la rawn haw lo a, a taksa na pawh a sawi theilo, a theih anga ulukin a inti fai a, khumah chuan hahdam thei ang berin a mu ta siai siai.

A naute chu a rilru ah a awmlo ti ila chu dawt a ni ngei ang. A thi tawh angem? Miten a trap thâwm kha an hria angem? A thih hmain amah chhanchhuaktu awm ta se , ani hi an rawn ringhlel angem tih chu a rilrua a awm dan a ni. Chu nausen rilru thianghlim, vawikhatmah he khawvel bawlhhlawha pian ve dil ngailo tu tan chuan lainatna leh hmangaihna chhete mah a neilo a nih chu maw le! Hmeichhiate ropuina a tihmelhem a, a siamtu Pathian pawi a sawi a ni.

Chutihlaiin, bawlhhlawh paihnaa naute chuan puitu a au ve emawni tih mai turin a aia uarin a trap a, thla eng mawi tak chuan naute tih lum inbeisei ve ni awm takin a theihtawpin enna a chhuah a, arsite lahin “naute, trap tawh suh, hei, nangmah tih hlim nan” ti ni awm takin uar zetin an in det chhawk sep sep bawk. Naute dawrawm tak ni si a , chutiang dinhmuna a nunna a la thlahlo chu mak tak a ni.

 Minute hnih hnu velah a piah lawkah zu in tuma rawn kal tlangval pali te pawh an rawn thleng ve a, an bike atranga an chhuk meizial an han zu tran chu an zinga pakhat chuan naute trap ri hre tlatin a hria. Midangte chu a han hrilh a, an ni lahin “I ramhuai thawnthu chhiar mai mai a nih chu” tiin fiamthu thawh nan an han hmang zui a, mahse , naute trap ri chu hai theih rual lohin a reh mai hauhlo. Ri lo chhuahna an han belchiang ta a, bawlhhlawh paihna atranga rawn chhuak ngei niin an hre ta a ni.

A rang a rangin chu ri lo chhuahna lam chu an pan ta vat a, an phone light chuan a theih ang angin an chhun bawk. Midangte chuan an trih deuh bawk nen an zinga a upa ber Ruata chuan “keiman ka zuk enfiah ange” tiin a chhuk ta a. An bawlhhlawh paihna hi awih tak a nilo hlauh a, harsa taka chhuk ngai a ni chiahlo. An thil paih threnkhatte avang chuan a tawlh leh deuh thrin, a thleng trep a, mahse, naute trap ri chu a hma aiin a zawi tawh, a chau ve te pawh a ni mahna. Amaherawhchu, reiloah vanneihthlak takin Ruata chuan a hmu fuh ta chat mai, zan thim hnuaia Ruata hmel thawveng ta huaih chu tu tan hmuh theih a nilo. Chutia rambo polythenea uluklo zeta tuam naute a han hmu zet chu lainatawm a ti ngei mai.

A tshirt hak lai leh a jacket hak lai chu a phelh sawk sawk a, polythene erawh paihin a thawmhnaw chuan a thiam ang tawkin a tuam a, a chhoh pui ta nghal. A thriante chuan an lo bawr nghal laih a, mahse, ruata chuan naute chu a thi mai dawna hriain khawmuang hman an nilo tih a hria, “Ramhlun, nang, khalh teh” tiin an zinga pakhat chu a bike chahbi a pe a,hmanhmawh takin an tlan ta a ni.

Ina haw pui tawp ai chuan tiin bawlhhlawh paihna atranga hla lo tea kêl nei te inah a thriante chu a dinpui a. Ruata che vel hrim2 chu a mangang a ni tih a hriat reng, kawngka pawh a kik deuh dawt2 a. Kêl puin chutianga tlangval, kawr pawh haloin naute a rawn pawm a hmuh chuan mak a ti hle a, thil awmzia a lo zawt vat. Ruata erawh chuan “Ka pu, kel hnute a awm chuan, hmanhmawhin” tih chiahin a lo chhang, thu tam sawina hun ni heklo le. Kel pu pawn a manganna te a lo hriatthiam pui a ni chek ang chu, a kel pui chu a kuai ding a, a hnute chu a sawr nghal sawk sawk.

 Tlem an sawr chhuak tihin chu naute, trah pawh trap hlei thei tawhlo chu fiante in kel hnute sawr hlim chu an in tir ta a. A zei pawh an zeilo hle mai. An chevel a hmuhin kel pu nupui chuan naute chu a rawn la ta vat a, amah zawkin kel hnute chu a hnek tir ta a ni. A tirah chuan a thuna thun a ngai deuh emaw tih mai tur a ni a, ruata phei chuan “A thi tawh emaw ni le” a ti rilru hial. Tun kum atana a vawikhatna atan tih tak zetin a trawngtrai ve a, a rilruin naute chu dam chhuah tir turin a ngen ngawih ngawih. Rei vakloah naute pawh a rawn ngik leh feih feih a, kel hnute chu tui tih hmel takin a hne ve ta dek dek. Thrian pali te leh kel pute nupa chu an thaw huaih a.

Hnute a hne zo ta maw tihah kel pi chuan naute chu Ruata a pe leh a, an thawmhnaw bawma a puan nuam neih thar ber, uluk em ema a thleh ngei mai chu a rawn la chhuak a, chu chuan duat takin naute chu a tuam thra ta a ni. Reiloah naute hmel pawh a rawn dik tran a, a awmna hmun leh an tuamna te chu nuam a ti ta deuh nge, a muhil ta siai2 mai. Tichuan, an ni thrian pali pawn thil thlen dan chu a bul atrangin kel pute nupa pawh an hrilh ve ta a, chutiang thil ti duh tu chu rapthlak an ti tlâng takzet.

Ruata te thrian za ho chuan tihdan tur an han ngaihtuah ngial a, an bangbo lutuk. A tawp a tawpah Ruata’n upa ber ka nia lawm ti rilru ve in “Kan inah hruai haw phawt mai ang u” a ti ta a. Hetianga hun khirh leh harsa deuha hma la tu a nih thrin avang hian a thriante pawh hian an u en thiam a, a thu an awih thiam thrin hle. Kel pu chuan an hawn tur tiin kel hnute a sawr sak leh a, “In mamawh leh hunah pawh rawn sawi zel rawh u” a ti mai a, chutiang taka Mizo pawh nilo leh nghalin khawngaihna leh lainatna a nei te chu Ruata-te thrian za ho pawn an haw kawngah an sawi ve laih laih.

Ruata te in an thleng a, anu leh paten an rawn buaipui nghal vat. Ruata naute ho, naupang pathumte chuan an rawn bawr nghal laih bawk. Ruata te unau hi pali an ni a, a te lam hi an chhang a zin avangin chhungkaw chhangchhia ti a sawi an ni ve fo. Anu leh paten thil awmzia an zawh chuan anni thrian za ho pawn an hrilhfiah mawlh mawlh a, Pi Siamite nupa pawh an rilru a buai hle. Pu Thanga chuan “Nu-i, khawtlang hruaitu te lam hi hrilh hria ila, tihdan an hre zawk ang a” a han ti a, mipa rilru ngaihtuahna fim tak atranga chhuak a ni.

 Mahse, hmeichhiate hi chuan an thinlung thusawi hi an ngaithla thiam khawp a, Pi Siamin naute hmel chu a han en thrin a, a hmel lah a thra reuhin a pawisawilo ngawih ngawih mai si. An mahni rawn bial ve laih laih tu a fate chu a han en leh a, an chana a dah phei chuan a mittui a tla mai dawn. Tichuan, “Paa, chhangchhe viau mah ila, Pathianin zah a ngai anga, kan enkawl thei maiin ka ring a ni” a ti ta a. Pu Thanga chuan hnial a duh khawp mai, mahse, mipate pawh hi lainatna thûk taka thuam an ni ve miau a, chu naute khawngaihthlak tak chu hnâwl mai harsa a ti a ni, duhloh a ni tih a chiang reng bawk si. Pi siami bawk cuan naute tih harh hlau tak chuan “Bawihte, i van lainatawm tak em aw, I hmeltha bawk si. Ruthi Lalhumhimi ni rawh aw” a ti sep sep a. Rei vak loah Ruthi pawh rawn harhin a riltram chu a trap leh ngâk ngâk a, Ruatate kel hnute hawn chu an chhuang lum nghal zung zung. Kel hnute an pek hnu chuan a muhil leh nghal mai bawk a. Chumi zan chuan Pu Thanga leh Pi Siamite chuan Ruthii chu mutpuiin a hnute ti lum turin an in thawh chhâwk zak zak a.

A tuk zingah chuan a khaw pum deuh thawin khawtlang bawlhhlawh paihnaa naute an chhar thu leh Pu Thanga te chhungin an enkawl rih thu chu an hre ta fur hlawm a. An khua ang, in zahnih tling awrh anga chutiang thil a thleng chu rapthlak an ti takzet. Mite chuan a nu tur awm anga tinzawn an nei thrap a, mahse, an tinzawn ber lahin anihloh thu Pathian hming chhal meuhin a sawi piap bawk si. Pathian hming meuh a ri si a, han tih luih vak ngaihna a awmlo, sawi zui erawh a hlawh khawp mai.

Pi siami te chhungkua pawh an buai ve nak nak thrin hle a, Ruthii erawh naute fel tak a ni vei roh a. Mite lainat a hlawhin, nu naupawmte chuan an hnute hnek tir tur liau liauin an kal chilh sap sap hlawm thin. Kel pute nu pa lahin kel hnute an rawn dah fo bawk a, a hmangaihna dawn zawng2 te chu a thrat pui nge amah a hrisel a, a chumin a tlei em em bawk. Thlakhat a tlin hnua biakina an hlan ni te chuan amah venghim tlattu Pathian hnenah hlan a ni tih hrethiam ve ni awm takin a ngawi kiau a, kohhran mipuite chuan Pu Thangate nupa chu ngaisang fe a lo en thrapin an zinga tleirawl pakhat erawhin a thih hmaa chu naute an chhanchhuak hman kher kher erawh pawi alo ti vawng vawng.

Ruthi chu a duhawm bawk si, mi lawm pawh a hlawh ngei mai. Duhsaktute chuan “Hei hi kan naute th(r)an san a nia, a la thar lutuk, lo ha ve rawh se” tiin an neih ang ang an rawn pe âwllo a, Pi Siamite phurrit tur pawh an chhâwk zangkhai khawp mai. Ruata hlei hlei chuan a duat roh a, tlangval, nula pawh ngaihsak loa inkhelh leh phur changa zu in ve mai thei, vei vak nei ngailo khan nau a awi leh dúrh dúrh thrin. Hringnunah chuan Ruata anga an tawn chin apianga insiam rem thiam thrinte hi mi fing chu an lo ni mai a nih dawn awm hi.

Ruthiin kum khat a tlin chuan Pi Siami te nupa pawn an theihtawpa ropuia lawmsak an duh ve a, an arpui tui lai pathum ngawt mai talhin an hem hmin a, thenrual thra te nen thingpui nen an ei ve laih laih hlawm a, kha zan te khan Ruthii chuan hringnuna a hmachhawn chhoh tur hrelo lêkin hlim takin a nui ve iarh2 kha a nia.

 Amaherawhchu, vanneihnate hian mi vannei sa te bawk hi a bâwm a, vanduaina te pawh hian a vanduai sa te bawk hi a ngaina emaw tih mai turin Pi Siami chu nat lawk em em pawh awmlo in a boral ta tlat mai. He tih hunlai hian Ruthii pawh kum thum a pumhlum ve trep tawh. Pathian ina a chhungkaw pekte hi a ngaina em em vek a, chung zingah chuan a nu hi a ngaina ber kha a nia. Khawiah pawh an inzui dat dat reng a, hrelo tan chuan nufa diktak annilo tih a hriat miahloh ang. Amah, Ruthii tak pawn a hrelo a, mahse, tunah chuan anu duhtak, nu hmangaihna diktak petu chuan a kalsan ta chu a ni si a.

Pi Siami a boral meuh chuan naupang dang pali ngawt enkawl ngai bawk nen Pu Thanga chuan tlinlo a inti tran ta hle mai, Ruata lah tlangval thawveng rual ve mai a ni a, a nau chu duatin duhsak ve viau mahse, han enkawl chiam dan erawh a thiamlo. An mahni lah nitina inhlawh an ni ve mai si a, tichuan, chhungkhat laina hnaite thurawn chu la in Ruthii chu fahrah ina dah an rel thlu ta a ni. An dah dawn zan chuan Pu Thanga pawn chhîn khat mah a chhînglo hial, a nupui Pi Siami khan a dem hle te a ring a, dah leh loh mai te a duh leh rum2 thin, mahse, bawlhhlawh paihnaa Ruthii venghimtu Pathian kha a la ngai reng a, khawi hmunah pawh awmse a venghim em em ang tiin a inhnêm a.

A tukah Ruthii thawmhnaw leh a thil neih ang angte chu an thîr thingrem neih thrat berah an khung sak a, fai taka bualin a kawrfual zinga a mawi ber chu an hak tir ve bawk. Chutianga a kawr mawi tak a hak takah chuan “Apa, khawiah nge kan kal dawn?” tiin fiah vaklo chuan a zawt ve a, Pu Thanga chuan chu hmeichhe naupangte chu en pawh a en ngamlo, tui hâl lo pui chuan tui a in khawlh khawlh ringawt mai a.

“Sawtah, hmun nuam deuhah nangchu i awm tawh dawn a lawm, khum nuam deuhah te I mu tawh bik anga” a ti ta nge nge a. Ruthii lahin “A pa, nangmah te nen, a u te nen a mi?” a ti leh ta zel, zawhna ho tak anga lang, chhân har tak a va ni si em. Pu Thanga chuan “a u te nen chuan nakinah kan lo kal ve ang” a ti leh a, chuvelah Ruthii chu “aih, ka duhlo” tiin trah a tum ti tih ta mai. Pu Thanga tih ngaihna hrelo chuan “Ni e, kan zavaiin kan awm vek ang” a ti a, a lâwm nan tiin a kekawr iptea a sweet dah chu a pe zui nghal, naupang tih der awlsam rual lek a la ni bawk a, Ruthii pawn hlim takin a lo ban ta vat.

Motora an luh dawn meuh zawngin Ruthii lainattu te chuan a rukin an mittui an hru fap fap a, he naupang pawisawilo nunkawng hi bumboh an tih pui takzet. Mahse, khawilai tukverh emaw atranga lo thlir ve rengtu tleirawli erawh kha zawngin thilthleng chu a thlir mawl ve tawp a, chu hmeichhe naupang, rilru thianghlim lutuk, ama tihsual vang liau liaua he khawvel hrehawm hmachhawn tur tan hian lainatna chhete mah a neilo nge, a lungphu chu chhete mahin a phût ran phah lo nia maw le. Engmah hrethiam heklo, Ruthii pawn amah thlaha rawn kalte chu a bye bye lêt ve lauh lauh a, Pu Thana fate zinga a naupang ber hnenah chuan “a u, Mama tam tawk ka lo hawn ang che* a ti a, a nui ve ver ver.

Kawng tluanin Ruthii chuan zawhna a ngah kher mai, kawng a thui deuh bawk nen zawhna a neihloh chângin a muhil a. A u ruata leh a pa ten hruaiin, an motor hman hi an khuaa mi awm thei ve takten Ruthii an lainat em avangin a thlâwn vekin fahrah in thleng an thlah dawn a ni.

 Darkar 6 lai an tlan hnuin fahrah in chu an thleng ta a,a kal ngailohna hmuna a han kal ta chu Ruthii pawh a kimki hle. He fahrah in hi mimal din a ni a, an thiltum te sorkar hnenah thlenin a tran nan sorkar pawn sum fai tam takin a pui nghe nghe. Compound zau tak neiin mipa leh hmeichhe awmna pawh a inhlat ang reng. Hnathawkte chuan an lo dawngsawng vat a, Ruthii chu tih tlangnêl tum takin an lo be zung zung. Ani erawh a kal ngailohnaa kal tih takah a tlangnello hle a, a pa kut chu a theih tawka nghetin a vuan ve trawk trawk. Pu thanga pawn chu chu hriain Ruthii a lainatna chu nasa tak a ni.

 An dorm chhungah chuan pawnlam mi luh an phalloh avangin Ruthii thawmhnaw chu thawktu pakhat chuan a keng lut vat a, Rei ngial tih tlangnel phawt tuma an han kawm vel hnu chuan Pu Thanga te pawn lêt leh an tum ve ta a, huphurhawm tak a ni. Thawktu pakhat hian duat takin a rawn pawm kâng ta nawlh a, chuvelah Ruthii chuan rang lutukin a pa chu a en nghal. A hmela hrilhhaina chu hmuh hmaih chi zia zang a nilo. Pu Ruata’n "Bawihte, a u nen hian i naute lem tur kan va lei lawk anga, kan lo kal leh nghal ang aw" a ti a, ruthi erawhin engmah sawilo in a lo en reng. Chu hmeichhe naupangte chuan enge a ngaihtuah ang tih chu a hmelah a ti lang miahlo nia maw le. A u Ruata paw’n "Bawihte" a ti a, a biangah a rawn fawp zeuh a, inherin an kal ta nghal.

 Mahse, pên sawm pawh an la pen lo ang tihin ruthii chu "apaaa” tiin a rawn trap ta chiam mai. A pawmtu kuahna atranga tâl thlâk tumin a theihtawpin a leng ve a, Pu Thanga chu a hawiletlo theilo. A ril a rah nilo in, a fate ang tak tak tak chuan a hmangaih zo lo pawh a ni mahna, mahse, chu naupangte chu a lainat takzet.

"Apa, ka lo kal ve duh" tiin a aw rawl chhuah meuhin a trap hawm hawm a, Pu Thanga chu a va let leh ta nge nge. "Bawihte, i naute lem tur kan va lei lawk ringawt dawn a lawm, kan lo kal leh dawn" a ti dam thlap a, mahse, chu thu chuan a ngaih a ti thra zo lo nge Ruthii trap lai chu a bang theilo. A bân te tak te chuan apa min pawm rawh ti ni awm takin a pa chu a han ban a, chutia thil a thlen takah zawng thawktu pakhat chuan "kan luhpui zawk ange, nangni pawh kal tawh zawk rawh u" a ti a, dorm lamah a hruai phei ta nghal.

Ruthii chuan trawngkam dang vak han chhakchhuah tur a hrelo, " apaa, a u , a u ruat” tiin a trap hawm hawm ringawt a, dorm chhunga an luh pui hnu thleng pawn ruthii trap ri chu Pu Thanga bengah a châm.

Ruata erawh hawileta a nau en turin a huaisen ngamlo, a hrehawm ti lutuk chu a bek a pawng trawlh trawlh ringawt. Mipa a ni a, trap khât tak a ni, mahse, tunah erawh naupang lainatawm Ruthii vang hian a mittui a dang zo mawlhlo . "Lalpa, venghim hram rawh aw" tiin a rilru chuan Pathian a au mawlh2 a.

An haw kawng tluan pawn sawi tur an vân khawp mai. In an han thleng a, miten chanchin an rawn zawt liam liam, a tu a te pawn Ruthii a lainatawm zia bak chhakchhuah tur an hrelo.

Chutihlaiin Ruthii erawh khatia an pawm luh hnu khan an thiam tawkin an thlêm ve a, rei tak chhung chu a bâng duhlo. A tawp a tawpah a in trap chau deuh nge ngik feih2 pahin amah pawmtu âwmah chuan a muhil ta a. Thawktute pawn an lainat ve kher mai, mahse, amah ang thoa lainatawm tak tak awm khawm an ni a, Ruthii pawh chhel taka a thran len theih nan an puih a ngai dawn tih an hria.

Darkar khat hnu velah Ruthii a rawn harh a, a awmna chu enin a han hawikual a, a pa te, a u Ruata te, a u Mary te hmuh tur awmloa a hmelhriat loh hlir a hmu chuan a tihlauthawng a, a trap leh dawn ta mai. Mahse, naupang zual deuh enkawltu, nu Mampuii an tih mai chuan a rawn ngaihven nghal vat a. Naute lem hlui lam tawh chu a khalh tur a tana pe nghalin Ruthii chu a kawmhlim ta thuai a.

 He fahrah inah hian hmeichhia 50 awm theiin, mipa pawh 50 an awm thei a, awm man te engmah chawi ngailo mahse, a awma ten nun nuam tak an hman ve theih nan a leng chin aia tam hnawh luih an duhlo a ni. Pathianin rem a tih chuan zauh zel erawh an tum a. Ruthii ang rual pawh hi an awm ve nual mai, naupang ta na fam chu inbe lum lam lo mahse, an inkhualte lem khawm a, Ruthii pawh tlei takin a awm chhunzawm ve mai bawk.

 Dar 5 leh a chanve a rikin chaw ei a hun a, chaw eina tur hi a hranin inte an sa a, a lai takah banga in pingin lehlamah hmeichhia, lehlamah mipa in an ei a. Ruthii pawh amah ang rual hmeichhe naupang dang pasarihte nen nu Mampuii chuan a rawn hruai hlawm a. Ruthii chu vawiina rawn kal chiah a ni bawk a, a zahzum lutukte hlauin a kâi a, hmeichhe naupang dang chu an sirah anlo kal ve bawk. An ni aia upa deuh kum 7 chin chunglam ho erawh an mahni enkawl biktu Miss Miriami chuan a rawn chhhuahpui a. He fahrah in enkawltu ber Dr. Zorinzuala hian fahrah an nih avanga awmtir ve nawk nawk a, ei huna eia, mut huna muttir ringawt a tum reng reng lo. A lâr pawh hi an lâr chak reng a, mi hausa inphal tak takte hian sum tam tham takin an rawn pui fo mai.

Chaw chu an han ei a, Ruthii pawn in lama an chaw eithrin nen chuan danglamna a hre lemlo, tui ti takin a ei ve pâk pâk a. An ei paha an hmui bawr leh an âwm an tih balh deuh niaihte chu an nu Mampuii chuan duhawm tih hmel takin a thlir hlawm a. A lian deuh ho erawh an nu Miriamin an thil ei pah chuan a tih fo thrin angin ei dan tuihnai zawkte a hrilh pah mawlh mawlh a. Mipa lamah pawh chutiang tho chu a ni, mipa nih vanga hap buan buan ringawtte chu an phal bik reng renglo.

 Pu Zorinzuala hian heng fahrahte hi nun pangngai tak an neih a duhpui a, chutiang tur chuan ruahmanna fel fai tak a siam bawk. Zanah lehkha an zir a, naupang tênawi ho erawh Nu Mampuiin pangpar lem cheite a tihpui a, chei nalh lemlo mahse an thiam ang tawkin an ti ve tih a hria a, a fuih pah mawlh mawlh. Rei vaklo ah an ni chu mu turin a hruai ta a.

An mut hmunah tawitea trawngtrai dan zirtirin, chumi zawh chuan an mutthilh chhuah nan hmanlai kan Mizo thawnthu Rimenhawihi thawnthu ngei mai kha a hrilh pah siam siam a, hmeichhe naupangte pawn ngaihnawm an tiin ngun takin an ngaithla a, Ruthii tak pawn reiloah a mit a chhing ta riai riai. A mutthilh dawn tak tak lamah vawiina nu Mampuiin naute lem hlui lam tawh a pek chu kuahin a kuahna vanga a lum ther ther avangin a u Mary taksa lum ther ther nen in ang a ti hle, reiloah tui takin a muhil ta a.

A mumangah chuan a u te nen an khuaa an tualah an lo infiam a, chutihlai tak chuan a u Ruata a rawn kal a. Ruthii chu a lo eichàk em em, “a u, api Zawmi ten lolipop chhuak thar an zuara, ka ei ve chak” a tih ngei mai kha a rawn hawnsak a, Ruthii chuan hlim em emin a u Ruata chu a lo ban vat. A u Ruata pawn duat takin a lo chawi kang a, mahse, reiloah a u chuan a hmun hriat ngai miahlohah a lo hruai a, a pa nen chuan "i naute lem tur kan va lei lawk ange" tiin an kal san ta daih mai. Ruthii chuan rei tak a nghak a, mahse, an lo let leh tawhlo. Zan a rei tawh si a, a hlau lutuk chu a trap a trap a, a u leh apa hming chu a lam ri chul a, chutia a mumanga a trap chu a takah a lo trap chhuak a, a bula naute lem chu nghet taka kuahin , lungchhe em emin a trap ta hliam2 a.

Rei vakloah nu Mampuii a rawn harh a, Ruthii bulah rawn kalin ama khum lamah chuan a chawi ta vat. Duat takin a kuah a, Ruthii lahin “a u, a pa” tih bak sawi a neilo, nu Mampuii erawhin thil awmzia a hrethiam vet a, a thiam ang tawka thlêmin a kuah hle hle. A bulah mut tir ve in “Bâng tawh la, thawnthu ka hrilh ang che” a tia, thlem lungawiin rimenhawihi thawnthu bawk chu a hrilh leh ta a. Ruthii trap bâng tawh lampang chu a la ngik feih feih a, a hnuah erawh mutchhuakin a rawn zêm leh ta chiai chiai a.

A harh leh meuh chuan mangchhia vang niloin dar sarih a rik apianga dar a rik vang zawk a ni a, an ni pawh an tho ta sap sap. Ruthii chuan midang ho chezia chu a han en a, toothpaste leh toothbrush te la in an ha an nawt dawn tih chu a hmu thiam ve a, chutiang a neih ve pawh a hre bawk silo. Mahse, nu Mampuii bawk khan a rawn buaipui leh vat a, toothpaste leh toothbrush chu rawn pe in midang ho nen an hmai phih thrinna ah a hruai ta a. Mahni ha nawh tak tak pawh an tan chuan la harsa miau hek le, nu Mampuii chuan a mal te tein uluk takin a tihsak leh vek a.

A enkawltute hi an hah thrin khawp mai. Hei vang hian home neitu , pu Zorinzuala hian naupang hetianga riahchilh a, a enkawl tur bik liau liau hi chu volunteer pawh phalloin interview a neih tir vek a, hlawh pawh pe thra tak a ni. An hna chu chiang taka an hriat nan training mumal tak pek vek an ni a, an hlawh a thra bawk a, an dinhmun atranga paih thlak theih reng an ni tih hriain tu tan mah duhdah taka thawh ngam chi a nilo. Amah, pu Zorinzuala tak hi chu thlakhatah vawihnih chiah a rawn lan chang a awm a, a changin a rawn kal zing deuh a, kal miahlo thlate pawh a nei bawk. Engpawhchu nise , a ai awhtu tur mi rintlak tak pakhat, home zawng zawng chunga thuneitu tur a dah a, ani hnen atrang hian thla tin report mumal tak a dawng thrin.

Ruthii te an intihfai zawh chuan a te ber atranga a lian ber thlengin an in line thlap a, tlangval , tê lam, intha zo zet hi an hmaah rawn dingin ani chuan exer te a lakpui ta a. Ruthii ten thiam ang tawka an han ti ve nek nek chu láwmawm tak an ni. Nu Mampuii pawn nakina en lêtah tiin an sir atrangin phone in a lo la char char a. Exer an lâk zawh chuan minute 40 vel lehkha an zir leh a, Ruthii te erawh nursery rhymes an zir thung. An thiam ang tawka ringin an sa ve a, Ruthii chu nimin atrang chiaha rawn tel a ni bawk a, midangte sawi mil chuan a risk ve nawk nawk a ni ber, nakinah erawh a la thiam ve dawn chiang khawp.

 Chaw eikhamah school kal turin an insiam sap sap a, classroom threuh te chu nei ve thlapin, uniform erawh an nei lemlo. An mahni thawmhnaw pangngai threuh chu an ha mai a, Ruthii te pawh nu Mampuii chuan a en fel hlawm a, an ni hi chu nursery em pawh kal rual an nilo bawk a, infiam puite, thawnthu hrilh te leh zaipuite, rawng chi hrang hrang hmanga thil cheite chu an ti tlangpui. A lian ho erawhin lehkha zir piah lamah la phiar thlengin an zir vek a, mipa leh hmeichhia thliar hrang lemlo in hengte hi an ti mai zel. Infiamna lah an uar em em a, naupang awmkhawm ta na fam chu Ruthii pawn nuam ti takin hun a hmang a, a u Ruata leh a pa te erawh nautelem lei tur chuan an rei tawh a ti takzet. Sawi erawh a sawichhuak lemlo a.

Nu mampuii chu fel a ti a, a bula awm nuam a ti hle. A thriante zingah Mary chu a ngaina ber emaw tih mai turin a bula awm nuam a ti ber a, Mary pawh a bulah chuan a tâp ve hret2 reng a. Tichuan, chu fahrah in, HOPE tia a hming an vuah ah chuan pangngai takin a nikhatna chu a hmang zo ve ta a, engthil nge a hmachhawn ve zel ang tih chu ngaihtuah thiamlo mahse, a mumanga a pa leh a u Ruata a hmuh leh vanga a trah leh tak chiamah chuan heng naupangchhia kan tih mai te pawh hian an thiam ang tawkin an ngaihtuahna hi anlo hmang ve thrin a ni tih a ti lang chiang hle.

Pu Thanga te inlamah erawh naupangho chuan Ruthii an ngaih zia an sawi chamchi a, Ruata tak pawn a ngai khawp mai. A tan chuan Ruthii hi a thil tih thrat tlemte awmchhunte zinga mi kha a ni miau a, ani khan chharlo se chu Ruthii hi dam tur a awm tawh kherlo maithei. Pathian hmanrua a nihna chen a awm niin a inhria a, chu chuan amahah a thra zawnga inngaihhlutna a thlen ve thrin kha a nia. Ruthii pawh tui takin nu Mampuii bulah chuan a mu ve leh siai siai a, ringlo te te chuan a hnâr ve sek sek mai. He hringnun zirthiam hun reng awm theilo an tih hi engtin tak rawn pal chho ve zel ang maw!

Hun a liam ve bek bek a, Ruthii pawn a awmna chu nuam ti ve tial tial in, thriante nena han khawsa ho ta reng chu a tlangnel ve telh telh bawk. Hmeichhe lian deuh ho te chuan an duat thiamin a awm zinga a naupang ber nih manah an ngaihsak thiam thrin hle a. Chu hmunah chuan a chângin an nui ho a, a changin an trap a, hnâwl nih vanga awmkhawm ta chu an nun pawh a rual khai hlawm hle. Thla 4 lai a awm hnu chuan a kum thum tlinna birthday a lo thleng ve ta reng mai. A u ruata khan a birthday lo thlen huna mi tur tiin a inhlawhna atrangin pawisa a lo khawl ve a, a pa pawh a hrilh hranlo. Hrilh pawh nise a hnial a ring biklo, mahse, an chhungkaw sum mamawhna hi a sâng em a, inhlawhna tur lah a awm reng biklo nen , a hrilh chuan chhungkaw mamawh huna pawh thren a hlau a ni.

Zinga Ruthii tho chu a thriante leh a u te ho chuan an wish ve sap sap a, a thren phei chuan thilpekte lo buatsaih sakin an thil zir atranga an thiam hairband siamte leh kawrlum phiar neuh neuhte chu an pe ve a. Mary pawn paper-ah a thiam ang tawka nalh amah leh Ruthii inkâi lai lem chu a ziak a, happy birthday, Ruthi tih chu uluk taka ziak ve in a pe ve bawk. Ruthii pawn chutianga a birthday an han hriatsak ve te chu a lâwm hle a, a nui ve sen sen mai. Nu Mampuii chuan a room-ah a hruai lut a, chocolate chu kheh sak mawlh mawlhin a eitir bawk. Midangte pawn thîk tinah an tin bik heklo.

Ruata chuan truck pakhat lo tlân lai chu a phar a, bei ve in Ruthii te awmna chu a pan a. A thlen chuan security hnenah a nau a hmuh theih leh theihloh a zawt a, ani erawh chuan harsatna lian thamah lo chuan inhmuh mai mai theih a nilo tih sawiin intluk tlânna an duh vang a ni tih a hrilh bawk a. Tichuan, a birthday a ni bawk nen thilpek a rawn kensak thu a sawi leh a, chu erawh an phal thu alo hrilh. Ruthii chu hmuh châk viau mahse, tihngaihna a awm silo a, amah enkawltu ber, nu Mampuii number te chu security hnenah chuan dilin motor remchang chu a châng leh ta zawk a.

Ruthiin kawrfual mawi tak pahnih , naute lem leh eitur threnkhat a dawn chuan nuam a ti ngang mai . Tu pek nge tih pawh zawhna chang a hre lem chuanglo. A u Ruatan a pocket money tur zawng zawng pawh inhrêkin hengte hi a lo lei a ni tih hria se, a u Ruata chungah chuan engtiang chiahin lawm ve ang maw?! Vawiina a thiltawn zawng zawngte hian he hmun hi a ngainat zual tir takzet a ni.